Mədəniyyət Nazirliyi və Azərbaycan Respublikasının Kino Agentliyinin (ARKA)  təşkilatçılığı ilə həyata keçirilən 2025-ci il üzrə “Dövlət dəstəyi ilə istehsal ediləcək film layihələri” müsabiqəsinin növbəti mərhələsi başa çatıb.

Müsabiqəyə 88 layihə təqdim olunub. Bu layihələr 41 yerli film istehsalçısı və prodüser şirkəti tərəfindən təqdim edilib. Layihələrin qəbulu iyunun 12-dək davam edib.

Layihələr Seçim komissiyası tərəfindən oxunub və müsabiqənin reqlamentində nəzərdə tutulan meyarlar əsasında qiymətləndirilib. Məqbiul qiymətləndirmə alan layihələr pitçinq mərhələsinə keçib.

ARKA-nın saytında dərc olunan siyahı üzrə 29 layihə (o cümlədən tammetrajlı bədii film layihələri – 6; qısametrajlı bədii film – 8; bədii-sənədli film –4; sənədli film – 3; animasiya filmləri – 5; tələbə filmləri – 3) pitçinq mərhələsində iştirak hüququ qazanıb.

Pitçinq mərhələsinin keçiriləcəyi tarixlər barədə iştirakçılara əlavə məlumat rəsmi şəkildə təqdim olunacaq. Müsabiqənin reqlamentinə əsasən tammetrajlı bədii film layihələri üzrə - storibord və tizer, digər layihələr üzrə isə yalnız storibord pitçinq mərhələsindən 3 (üç) iş günü öncəyə qədər Azərbaycan Respublikası Kino Agentliyinə rəsmi e-poçt vasitəsilə təqdim olunmalıdır.