- 19-08-2015
Xalq şairi, müasir Azərbaycan ədəbiyyatının görkəmli nümayəndəsi Bəxtiyar Vahabzadənin anadan olmasının 90 illiyi ilə əlaqədar Qax şəhərindəki Cəfər Cabbarlı adına Mərkəzi kitabxanada “Sözü və özü qocalmayan şair” adlı ədəbi-bədii gecə keçirilib.Təhsil və mədəniyyət işçilərinin, ziyalıların, qələm sahiblərinin iştirak etdikləri tədbirdə rayon Mərkəzləşdirilmiş Kitabxana Sisteminin direktoru Güllü Əhmədova, şairə Solmaz Elqızı və başqaları Bəxtiyar Vahabzadənin yaradıcılığının müxtəlif məqamlarına toxunublar. Vurğulanıb ki, şair bədii fikrimizin zənginləşməsində mühüm rol oynayıb, daim xalqının düşüncə və arzuları, hiss və duyğuları ilə yaşayıb. Onun zəngin yaradıcılığı poeziyamızın, şeirimizin cövhəri olub.
Tədbirdə Bəxtiyar Vahabzadənin şeirləri, sözlərinə bəstələnmiş mahnılar səsləndirilib, həyat və yaradıcılığından bəhs edən film göstərilib.
