“Aktau–2025: Türk Dünyasının Mədəniyyət Paytaxtı” ili çərçivəsində keçirilən “Türk dünyasının ənənəvi uşaq oyunları” mövzusunda gənc rəssamlar müsabiqəsinə yekun vurulub.

Müsabiqə Qazaxıstanın Mədəniyyət və İnformasiya Nazirliyi və TÜRKSOY-un dəstəyi ilə reallaşıb.

Qaliblərin əsərlərindən ibarət sərgi TÜRKSOY-un Mədəniyyət Nazirləri Daimi Şurasının Aktau şəhərində keçirilən 42-ci iclası ərəfəsində açılıb. 

Müsabiqə türk xalqlarının dəyərlərinin, həmçinin onların maddi və qeyri-maddi mədəni irsinin qorunmasına və bu irsin gələcək nəsillərə ötürülməsinə xidmət edir.

Sərgidə çıxış edən TÜRKSOY-un baş katibi Sultan Raev diqqətə çatdırıb ki, təşkilat hər il bu qəbildən müsabiqələr təşkil edir: "Builki müsabiqə tematik xarakter daşıyır və biz onu türk xalqlarının artıq unutmağa başladığı uşaq oyunlarına həsr etmişik. Xalqlarımızın bu cür mirasını uşaqların görməsi çox sevindiricidir. Onlar türk ölkələrinin milli oyunlarını necə qavradıqlarını öz baxışları ilə göstəriblər. Hər biri öz xalqının oyunlarını təsvir edib”.

Məlumat verilib ki, müsabiqədə iştirak üçün 2 mindən çox müraciət olub və yekunda Azərbaycan, Qazaxıstan, Qırğızıstan, Özbəkistan, Türkmənistan və Türkiyədən olan 18 gənc rəssam birinci, ikinci və üçüncü yerlərə layiq görülüb.

Müsabiqənin nəticələrinə əsasən, hər ölkədən üç ən yaxşı iş, eləcə də final mərhələsində iştirak edən əsərlər daxil edilməklə xüsusi albom da hazırlanıb.