Bakı Slavyan Universitetinin (BSU) rektoru Anar Nağıyev “Konstitusiya və Suverenlik İli” çərçivəsində fəaliyyət planına uyğun olaraq “Yeni dövrün Azərbaycanı” mövzusunda BSU-nun nəzdindəki Məktəb-lisey kompleksində şagirdlərlə görüş keçirib.

Anar Nağıyev çıxış edərək, bu görüşlərin əsas məqsədinin Konstitusiya və suverenlik anlayışlarının mahiyyətini izah etmək, tarixi prosesləri araşdırmaq və bu mövzuda müzakirələr aparmaqdan ibarət olduğunu qeyd edib.

Ümummilli lider Heydər Əliyevin müstəqil Azərbaycanın formalaşması və inkişafı istiqamətindəki misilsiz xidmətlərindən bəhs edən rektor 1995-ci ildə müstəqil Azərbaycanın Konstitusiyanın qəbul edilməsi prosesindən danışıb, Heydər Əliyevin rəhbərliyi altında Azərbaycanın müstəqilliyinin qorunması və güclü dövlət qurulması istiqamətində həyata keçirilən fundamental islahatları bir daha xatırladıb.

Rektor çıxışında Prezident İlham Əliyevin rəhbərliyi ilə Azərbaycanın suverenliyinin tam bərqərar olması, işğaldan azad edilmiş ərazilərdə genişmiqyaslı bərpa və quruculuq işlərinin aparılması, 2003-cü ildə dövlət başçısının xalqa verdiyi vədlərin ardıcıl şəkildə yerinə yetirilməsindən söz açaraq, yeni dövrün Azərbaycanının daha böyük uğurlara hədəfləndiyini vurğulayıb.

Görüşdə YAP Nəsimi rayon təşkilatının sədri Azər Süleymanov gənclərin dövlətin inkişafında və milli maraqların qorunmasında rolundan bəhs edib.

Sonda məktəb-lisey kompleksinin direktoru İlahə Carçıyeva belə maarifləndirici tədbirlərin təşkilinə görə BSU rəhbərliyinə təşəkkür edib.