2020-ci ilin 44 günlük Vətən müharibəsində qazandığımız şanlı Zəfərin uğurlu müqəddiməsi 2016-cı ilin Aprel döyüşləri olub. Dörd gün (2-5 aprel) sürən bu döyüşlərdə əldə etdiyimiz qalibiyyət Azərbaycanın öz torpaqlarını nəyin bahasına olursa-olsun azad edəcəyini dünyaya göstərdi.

Bu tarixin ildönümü münasibətilə Milli Kitabxanada “Aprel döyüşləri – böyük zəfərin başlanğıcı” adlı virtual sərgi və eyniadlı ənənəvi geniş kitab sərgisi istifadəçilərə təqdim olunub.

Kitabxanadan bildirilib ki, sərgilərdə Aprel döyüşlərində Lələtəpə, Talış yüksəklikləri və digər bir sıra mühüm strateji yüksəkliklərin işğaldan azad edilməsindən, bu döyüşlərin iştirakçıları ilə müsahibələr, Vətən müharibəsi, şanlı Qələbə, tarixi Zəfərimizin əldə olunmasında Müzəffər Ali Baş Komandan İlham Əliyevin uzaqgörən hərbi və siyasi strategiyasından, Azərbaycan əsgərinin əfsanəvi qəhrəmanlıqlarından, torpaqlarımızın azadlığı uğrunda canından keçən şəhidlərimizin döyüş yolundan bəhs edən Azərbaycan və müxtəlif dillərdə kitablar, dövri mətbuat məqalələri, fotolar nümayiş olunur.

Virtual sərgi ilə tanış olmaq istəyənlər linkindən istifadə edə bilərlər.

***

Azərbaycan Milli Kitabxanasının əməkdaşları tərəfindən “Aprel döyüşləri” adlı elektron məlumat bazası da onlayn rejimdə istifadəçilərə təqdim olunub.

Elektron məlumat bazasında Aprel döyüşləri haqqında kitablar, məqalələr, fotoqalereya və s. özündə əks etdirən materiallar tammətnləri ilə nümayiş olunur.

Elektron məlumat bazası ilə tanış olmaq istəyənlər https://anl.az/el/emb/aprel_doyusleri/index.html linkindən istifadə edə bilərlər.