Aprelin 5-də “Muzeydə musiqili gecələr” silsiləsi çərçivəsində bəstəkar, Əməkdar incəsənət xadimi Cəlal Abbasovun yaradıcılığına həsr olunmuş konsert-portret təşkil ediləcək. Tədbir Bakı Müasir Musiqi Cəmiyyəti və Muzey Mərkəzinin birgə layihəsi çərçivəsində gerçəkləşəcək.

Tədbirin moderatoru bəstəkar Firudin Allahverdi olacaq.

Konsert proqramında bəstəkarın “Onsuz...”, “Meditations”, “2 nömrəli simli kvartet”, “Vokal silsilələr” kimi əsərləri səsləndiriləcək. Əsərləri “Əkinçi” kvarteti, solistlər Fəridə Məmmədova (soprano), Yuliya Kərimova (fortepiano), Atabala Manafzadə (fortepiano), Mirxalid Məmmədzadə (fleyta), Kamil Hüseynzadə (vibrafon) və Asim Xəlilov (violonçel) ifa edəcək.

Cəlal Abbasov 1980-ci ildə Üzeyir Hacıbəyli adına Azərbaycan Dövlət Konservatoriyasının (indiki Bakı Musiqi Akademiyası) bəstəkarlıq fakültəsini (Qara Qarayevin sinfi) bitirib. Onun yaradıcılığına “Qarabağ trilogiyası” (Şuşaya həsr olunmuş “Bir daha səni görə bilsəydim...” adlı simfoniya, Milli Qəhrəman Albert Aqarunovun və Qarabağ şəhidlərinin xatirəsinə “İn memoriam” rekviyemi və Vətən müharibəsində Qələbəyə həsr olunmuş “Şanlı Azərbaycan” odası), simfoniyalar, kantatalar, iki simli kvartet, orqan üçün “Postlüdiya” (Qara Qarayevin xatirəsinə), “Sevinc baharı” uşaq operası və digər əsərlər daxildir. Əməkdar incəsənət xadimi Cəlal Abbasov Bəstəkarlar İttifaqının katibidir.

"Muzeydə musiqili gecələr" layihəsinin əsas məqsədi Azərbaycan bəstəkarlarının konsert-portretlərinin təşkili və onların yaradıcılığının özəlliklərini tanıtdırmaqdır. Layihə çərçivəsində müəllif musiqisinin təqdimatına da geniş yer ayrılır.

Tədbir saat 19:00-da başlayacaq. Giriş sərbəstdir.