Prezident İlham Əliyev aprelin 1-də “Gənc istedadlara xüsusi təqaüdlərin verilməsi haqqında” sərəncam imzalayıb.

Sərəncamla, Azərbaycan Respublikası Prezidentinin 2023-cü il 30 noyabr tarixli 2368 nömrəli Fərmanı ilə təsdiq edilmiş “Gənc istedadların “Qızıl kitab”ı və xüsusi təqaüdü haqqında Əsasnamə”nin müvafiq bəndinə uyğun olaraq, adları “Qızıl kitab”a yazılmış gənc istedadlara xüsusi təqaüdlərin verilməsi məqsədilə Mədəniyyət Nazirliyinə 98 min 794 manat məbləğində vəsait ayrılıb.

Maliyyə Nazirliyinə sərəncamda nəzərdə tutulan maliyyələşməni təmin etmək, Mədəniyyət Nazirliyinə sərəncamdan irəli gələn məsələləri həll etmək tapşırılıb.

Qeyd edək ki, gənc istedadlar üçün xüsusi təqaüd və “Gənc istedadların “Qızıl kitab”ı  Azərbaycan Respublikası Prezidentinin 1996-cı il 22 iyun tarixli 464 nömrəli Fərmanı ilə təsis edilib.

“Gənc istedadların “Qızıl kitab”ı və xüsusi təqaüdü haqqında Əsasnamə” həmin fərmana uyğun olaraq hazırlanıb. Əsasnamə Azərbaycanın gənc istedadlarının adlarının “Qızıl kitab”a yazılması və adları bu kitaba yazılmış gənc istedadlar üçün xüsusi təqaüdün verilməsi qaydalarını müəyyən edir.

“Qızıl kitab” və təqaüd mədəniyyət sahəsində xüsusi qabiliyyəti olan 10 yaşdan 25 yaşadək Azərbaycan vətəndaşlarına Azərbaycan Respublikası Prezidentinin şəxsi himayəsini, onların yaradıcılıq potensialının inkişaf etdirilməsi üçün dövlət qayğısını təmin etmək məqsədilə təsis olunub.

Əsasnaməyə görə, "Qızıl kitab"a mədəniyyət sahəsi üzrə beynəlxalq və ya ölkə əhəmiyyətli müsabiqə, yarış və ya festivalların laureatı olan şəxslərin; bu sahə üzrə təhsildə yüksək nəticələr əldə edən şəxslərin adları salınır.

Şəxsin adı “Qızıl kitab”a Azərbaycan Respublikası Prezidentinin təşəbbüsü və ya Mədəniyyət Nazirliyinin təqdimatı əsasında dövlət başçısının sərəncamı ilə daxil edilir.

Təqaüd şəxsə onun adı “Qızıl kitab”a yazıldığı tarixdən hər dəfə 3 il müddətinə təyin edilməklə, 25 yaşına çatanadək aylıq verilir.

Təqaüdün məbləği Azərbaycan Respublikasının Prezidenti tərəfindən müəyyən edilir.