Nizami Gəncəvi adına Milli Azərbaycan Ədəbiyyatı Muzeyində “Risalə” elmi araşdırmalar jurnalının növbəti nömrələrinin təqdimatı keçirilib.

Ədəbiyyat Muzeyinin direktoru akademik Rafael Hüseynov “Risalə” elmi araşdırmalar jurnalının ayrı-ayrı nömrələrinin təqdimatının ənənəyə çevrildiyini söyləyib, ötən il jurnalın daha iki nömrəsinin işıq üzü görməsini Azərbaycan elmi-mədəni həyatında əlamətdar hadisə kimi dəyələndirib.

“Risalə” elmi araşdırmalar jurnalının filologiya və sənətşünaslıq elm sahələri üzrə Ali Attestasiya Komissiyasının tövsiyə etdiyi dövri elmi nəşrlər siyahısında olduğunu bildirən akademik Rafael Hüseynov nəşrin yeni saylarında muzey əməkdaşlarının, elmlər doktorları, fəlsəfə doktorlarının, eləcə də dissertasiya müdafiəsinə hazırlaşan gənc tədqiqatçıların müxtəlif mövzuları ehtiva edən elmi məqalələrinin dərc edildiyini vurğulayıb. Qeyd edib ki, araşdırmaçılar məqalələrində Azərbaycan klassik və müasir ədəbiyyatının bir sıra aktual və az öyrənilmiş problemlərinə yeni görüş bucağından yanaşıblar. 

Direktor Ədəbiyyat Muzeyi tərəfindən, “Risalə” elmi araşdırmalar jurnalı ilə yanaşı, “Beşlik” - “Qaynaq” mənbələr toplusu, “Şərq” tərcümə toplusu, “Xəzinə” kataloqlar toplusu və “Məclis” mərasimlər toplusunun da nəşr edildiyini diqqətə çatdırıb, sanballı yazıların, elmi məqalələrin və müxtəlif araşdırmaların toplandığını bu nəşrlərin hər birinin böyük dəyər daşıdığını bildirib.

Tədbirdə iştirak edən məqalə müəlliflərinə “Risalə” elmi araşdırmalar jurnalının yeni nömrələri təqdim olunub.

“Risalə” jurnalı 2004-cü ildən etibarən ildə iki dəfə nəşr olunur və məzmunu etibarilə filologiya (Azərbaycan və dünya ədəbiyyatı, ədəbiyyat nəzəriyyəsi, ədəbi təhlil və tənqid, mətnşünaslıq) və sənətşünaslıq (muzeyşünaslıq) sahələri üzrə məqalələri əhatə edir. Filologiya və sənətşünaslıq elm sahələri üzrə Ali Attestasiya Komissiyasının tövsiyyə etdiyi dövri elmi nəşrlər siyahısında olan jurnal 2019-cu ildə Ədliyyə Nazirliyinin “Mətbu nəşrlərin reyestri”nə daxil edilib.