Bu il Azərbaycanın görkəmli teatr və kino aktrisası, Xalq artisti, Dövlət mükafatı laureatı Amaliya Pənahovanın (1945–2018) 80 illik yubileyidir.

Akademik Milli Dram Teatrında aktrisanın uzun illər baş rolu oynadığı səhnə əsərlərindəm biri – "Xurşidbanu Natəvan" tamaşası yubiley münasibətilə noyabrın 26-da nümayiş olunub.

Tamaşadan əvvəl Amaliya Pənahovanın sənət yoluna nəzər salınıb.

Mədəniyyət naziri Adil Kərimli aktrisanın zəngin yaradıcılıq irsindən, Azərbaycan mədəniyyətinə, teatr və kino sənətinə bəxş etdiyi böyük töhfələrdən söz açıb. Azərbaycan Teatr Xadimləri İttifaqının sədri Xalq artisti Hacı İsmayılov, teatrşünas, Əməkdar incəsənət xadimi, professor Məryəm Əlizadə, Bakı Bələdiyyə Teatrının baş rejissoru Xalq artisti Mərahim Fərzəlibəyov sənətkar haqqında xatirələrini bölüşüblər.

Sonra tamaşa nümayiş olunub.

Xalq yazıçısı İlyas Əfəndiyevin eyniadlı pyesi əsasında hazırlanan tamaşanın bədii rəhbəri və quruluşçu rejissoru mərhum Xalq artisti Azər Paşa Nemətov, quruluşçu rəssamı Əməkdar mədəniyyət işçisi İlham Elxanoğlu, bəstəkarı Xalq artisti Siyavuş Kərimi, rejissor assistenti Xanım Həsənovadır.

Tamaşada Xalq artistləri Məleykə Əsədova (Xurşidbanu Natəvan), Hacı İsmayılov (Qoca Knyaz), Rafiq Əzimov (Mirzə Ruhullah), Kazım Abdullayev (Canişin), Əməkdar artistılər Anar Heybətov (Knyaz Xasay), Elşən Cəbrayılov (Seyid Hüseyn), Elnar Qarayev (Mamayı), Mirzə Ağabəyli (Kor kamançaçı), Kazım Həsənquliyev (Məliküldövlə), Əlvida Cəfərov (Möhnət), Ayşad Məmmədov (Qala rəisi), Elşən Rüstəmov (Şahzadə), aktyorlar Elçin Əfəndi (Hidayət xan), Vüsal Mustafayev (Zahir bəy), Ramin Şıxəliyev (Daşdəmir), Lalə Süleymanova (Bəyim), Cavidan Novruz (Nəvvab), Məhsəti Tahirzadə (Təhminə), Rüstəm Rüstəmov (Şahmar), Tural İbrahimov (Mixaylov), Firuzə Balayeva, Elsevər Rəhimov, Elçin Nurəliyev, Nəzrin Abdullayeva (kültəvi səhnə) iştirak edirlər.

Tamaşa Qarabağ xanı İbrahim xanın nəvəsi şairə Natəvanın həyatından bəhs edir. Tamaşaçı onu səhnədə müdrik, Vətəninə və xalqına bağlı ictimai xadim, həm də həssas, zərif bir qadın, ana kimi görür. Natəvanı həm doğma Şuşanın, həm də ikiyə bölünmüş Azərbaycanın taleyi narahat edir. Tarixi hadisələrin fonunda xalqın taleyi, azadlığı və birliyi ideyası ön plana çəkilib.