Mədəniyyət Nazirliyinin musiqi və incəsənət sahəsində islahatları çərçivəsində təhsilin keyfiyyətinin, eləcə də təhsilverənlərin peşə səriştəsinin artırılması məqsədilə keçirilən attestasiya ilə bağlı yerlərdə məlumatlandırıcı görüşlər təşkil edilir.

Mədəniyyət Nazirliyi Mədəniyyət üzrə Elmi-Metodiki və İxtisasartırma Mərkəzi (MEMİM) tərəfindən ilk belə görüşlər Mərkəzi Aran Regional Mədəniyyət İdarəsinin tabeliyində fəaliyyət göstərən uşaq musiqi və incəsənət məktəblərinin təhsilverənləri ilə Ağdaş və Mingəçevir şəhərlərində keçirilib.

Görüşlərdə peşəkar mütəxəssislərin iştirakı ilə attestasiyanın mahiyyəti və hüquqi əsasları, attestasiya proqramının məzmunu, müvafiq ixtisaslara dair sahə və tematik mövzular üzrə nəzəri və praktiki məqamlar müzakirə edilib.

Uşaq musiqi və incəsənət məktəblərində çalışan təhsilverənlər üçün sistemli şəkildə təşkil olunan məlumatlandırıcı görüşlərin məqsədi müvafiq ixtisaslar üzrə müəllimlərə attestasiyanın mahiyyəti və keçirilməsi qaydaları, attestasiya proqramına daxil olan mövzuların daha ətraflı izah olunması və attestasiyaya hazırlığına kömək etməkdir.

Mədəniyyət Nazirliyinin digər regional idarələrinin tabeliyindəki uşaq musiqi və incəsənət məktəblərinin müəllimləri ilə də məlumatlandırıcı görüşlərin keçirilməsi nəzərdə tutulur.