Noyabrın 29-da Laçın şəhərində "MDB ölkələrində müasir kino istehsalının inkişafı" mövzusunda dəyirmi masa təşkil olunub.

Prodüser, aktyor Azər Aydəmirin moderatorluğu ilə reallaşan tədbirdə çıxış edən Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov rayonda həyata keçirilən infrastruktur layihələrindən danışıb. Qeyd edib ki, Laçında mədəni quruculuğa xüsusi diqqət yetirilir. Şəhərdə yaradılan ilk mədəniyyət təsisatlarından biri də "Hoçazfilm" studiyasıdır. O, Laçının kino çəkilişləri üçün maraqlı məkanlardan olduğunu da bildirib.

Mədəniyyət nazirinin müavini Fərid Cəfərov qeyd edib ki, mədəniyyət xalqları birləşdirən mənəvi körpüdür. Kino sənəti isə xalqın tarixi, mədəni kimliyi və dünyagörüşünü əks etdirən ən güclü bədii vasitələrdən biridir.

Bildirilib ki, Azərbaycan dövləti kinematoqrafiyanın inkişafını strateji prioritetlərdən biri kimi müəyyən edib. Bu istiqamətdə son illərdə mühüm institusional addımlar atılıb, yeni maliyyə mexanizmləri formalaşdırılıb, yaradıcı mühitin beynəlxalq inteqrasiyası gücləndirilib. Mədəniyyət Nazirliyinin tabeliyində fəaliyyət göstərən Azərbaycan Respublikasının Kino Agentliyi (ARKA) son üç ildə 70-dən çox film layihəsinin istehsalına maliyyə dəstəyi göstərib. Bu layihələrdən 50-dən çoxu artıq tamaşaçılara təqdim olunub.

Qeyd olunub ki, Azərbaycan Respublikasında tətbiq edilən film istehsalı xərclərinin qismən geri ödənilməsi (rebate) mexanizmi ölkəmizdə film çəkilişləri üçün əlverişli şərait yaradıb və beynəlxalq prodüserlər üçün Azərbaycanı daha cəlbedici kino məkanına çevirib: "Azərbaycan tərəfi MDB məkanında kino sahəsində birgə fəaliyyətin daha da genişləndirilməsini vacib hesab edir. Bu istiqamətdə koproduksiya layihələrinin həyata keçirilməsi, ortaq ssenari laboratoriyalarının təşkili, gənc kinematoqraflar arasında təcrübə mübadiləsinin aparılması və regional film forumlarının keçirilməsi üçün yeni təşəbbüslər irəli sürürük. Bu əməkdaşlıq çərçivəsində hazırda “Molla Nəsrəddin, çətin günlərimin dostu” kimi birgə istehsal layihələri xalqlarımız arasında ortaq mədəni irsin və mənəvi yaxınlığın kino dili ilə ifadəsinə xidmət edir".

Daha sonra MDB Ölkələrinin Humanitar Əməkdaşlıq üzrə Dövlətlərarası Fondunun icraçı direktoru Tair İksanov, Azərbaycan Milli Məclisinin deputatı Rövşən Muradov, ARKA-nın baş direktorunun müavini Qurban Pirimov, "Hocazfilm" studiyasının direktoru Amil Məmibəyli, Nizami Kino Mərkəzinin direktoru Əli-Səttar Quliyev, Belarus nümayəndəsi Svetlana Semaşko, "Qırğızfilm" studiyasının aparıcı mütəxəssisi Rəbiyyə Mirlanova, "Roskino" ASC-nin baş direktorunun müşaviri Yekaterina Svirina, "Tacikfilm"in nümayəndəsi Akmal Abdullozoda, Özbəkistan Kinematoqrafiya Agentliyinin əməkdaşı Mannob Kuçkarov və başqaları çıxış ediblər.

MDB ölkələri arasında kino sahəsində əməkdaşlığın perpektivlərindən söz açılıb, birgə layihələrin əhəmiyyəti vurğulanıb.

***

Prezident İlham Əliyevin rəhbərliyi ilə işğaldan azad olunmuş ərazilərdə həyata keçirilən genişmiqyaslı bərpa, quruculuq bu torpaqlarda mədəni irsimizin dirçəlişinə də zəmin yaradır. Laçın şəhərinin 2025-ci il üçün “MDB-nin Mədəniyyət Paytaxtı” elan edilməsi bu şəhərin beynəlxalq miqyasda Azərbaycanın mədəniyyət beşiklərindən biri kimi təqdim olunmasında mühüm rol oynayıb.

Mədəniyyət nazirinin müavini Fərid Cəfərov bu sözləri jurnalistlərə müsahibəsində deyib.

Nazir müavini Laçın şəhərində keçirilən “MDB ölkələrində müasir kino istehsalının inkişafı” mövzusunda dəyirmi masanın ölkələrarası əməkdaşlığa töhfə verəcəyini söyləyib. O, MDB ölkələrinin kino qurumlarının rəhbər şəxsləri və nümayəndələrinin iştirakı ilə faydalı təcrübə mübadiləsi apardığını diqqətə çatdıraraq, belə tədbirlərin əməkdaşlıq baxımından faydalı olduğunu vurğulayıb.