Mədəniyyət Nazirliyinin tabeliyində fəaliyyət göstərən Azərbaycan Respublikası Kino Agentliyi (ARKA) tərəfindən elan edilən 2025-ci il üzrə “Dövlət dəstəyi ilə istehsal ediləcək film layihələri müsabiqəsi”nin pitçinq mərhələsi yekunlaşıb.

Pitçinq mərhələsi dörd sessiya üzrə təşkil olunub və hər sessiya canlı yayım vasitəsilə ictimaiyyətə təqdim edilib. Bu yanaşma prosesin şəffaflığını təmin edib. Ekspert şurasının fəaliyyətini dəstəkləmək üçün xüsusi hazırlanmış kitabçalar üzvlərə təqdim olunub.

Müsabiqəyə ümumilikdə 41 şirkət tərəfindən 88 film layihəsi təqdim olunub. Onlardan 17-si əvvəllər ARKA-dan maliyyə dəstəyi almış, 24-ü isə ilk dəfə müraciət edən şirkətlərin layihələridir. Təqdim edilən layihələr arasında müxtəlif janrlar yer alır:

24 tammetrajlı bədii film

21 qısametrajlı bədii film

14 sənədli film

14 bədii-sənədli film

15 animasiya filmi

Builki müsabiqənin xüsusiyyətlərindən biri də özəl sektorun fəal iştirakının təmin olunmasıdır. Təqdim edilən büdcələrə əsasən, layihə xərclərinin təxminən 31 faizi özəl şirkətlər, 69 faizi isə dövlət dəstəyi hesabına qarşılanması nəzərdə tutulur. Bu göstərici kino sahəsində dövlət-özəl tərəfdaşlığının güclənməsi baxımından əhəmiyyət daşıyır.

Seçim nəticəsində 29 layihə pitçinq mərhələsinə buraxılıb. Onların bölgüsü belədir:

6 tammetrajlı bədii film

8 qısametrajlı bədii film

4 bədii-sənədli film

3 sənədli film

5 animasiya filmi

3 tələbə filmi

Seçim komissiyası və Ekspert şurasının yekun iclası oktyabrın 7-də keçiriləcək, qalib layihələrin siyahısı ictimaiyyətə açıqlanacaq.