Xəbər verdiyimiz kimi, 30-31 avqust tarixlərində Göygöl rayonunun Keşkü kəndində “II Moruq Festivalı” keçirilir. 

Göygöl Rayon İcra Hakimiyyətinin təşkilatçılığı, Kənd Təsərrüfatı Nazirliyi, Dövlət Turizm Agentliyi, "AzerGold" QSC, Aqrar İnnovasiya Mərkəzi, Gəncə-Daşkəsən Regional Mədəniyyət İdarəsi və digər qurumların tərəfdaşlığı ilə gerçəkləşən festivalın məqsədi bölgənin turizm sektoru üzrə rəqabət qabiliyyətini yüksəltmək, aqroturizmin inkişafına dəstək vermək, Göygöl rayonunda istehsal olunan kənd təsərrüfatı məhsullarını tanıtmaq, moruq istehsalını təşviq etməkdir. 

Festivalda yerli istehsalçılar tərəfindən təqdim olunan moruq növlərinin dequstasiyası və satışı təşkil edilir. Ziyarətçilər müxtəlif dequstasiya tədbirlərində iştirak etmək, ustad dərslərini, o cümlədən moruqla rəsm çəkmək dərsini izləmək imkanı qazanıblar. Eyni zamanda sənətkarların hazırladıqları əl işlərinin sərgi-satış yarmarkası, açıq havada konsert proqramı da təşkil edilib. 

“Moruq Festivalı”nın Göygöl rayonunda keçirilməsi təsadüfi deyil. Göygöl rayonu ən çox giləmeyvə, o cümlədən moruq becərilən rayonlardan biridir.  Moruq xalq təbabətində ən geniş istifadə olunan giləmeyvələrdən sayılır. Çay kimi dəmlənmiş meyvələr soyuqdəymədə hərarət salan vasitə kimi istifadə edilir. Moruq tərkibində ən çox dəmir olan giləmeyvədir. Giləmeyvənin 100 qramının enerji dəyəri 41 kaloridir. Qlükoza və fruktoza ilə zəngin olduğuna görə ürək-damar və beyin patologiyası zamanı faydalı hesab olunur.

“Moruq Festivalı” məhsul bayramı xarakteri daşımaqla yanaşı, moruq istehsalçılarına yeni işgüzar əlaqələr qurmağa, məhsullarını geniş auditoriyaya tanıtmağa imkan verəcək.