Onun ilk yazısı dövri mətbuatda 1971-ci ildə işıq üzü görüb. İndiyədək 20-dən çox qəzet və jurnalda 5 mindən artıq məqaləsi dərc edilib. Jurnalist fəaliyyəti ilə yanaşı, bədii yaradıcılıqla da məşğul olur. Qarabağ mövzusunda və müharibə faciələrinə həsr olunan “Müharibə”, “Ayrılıq olmayaydı”, “Bura Vətəndir”, “Göz yaşı qurumur”, “Yeri görünən insan” və “Gözü yolda qalan var” kitabları nəşr edilib. 

Bu barədə Azərbaycan Jurnalistlər və Yazıçılar birliklərinin üzvü Salman Alıoğlunun Mətbuat Şurasında keçirilən 70 illik yubiley tədbirində bəhs olunub.

Mətbuat Şurasının sədri Rəşad Məcid uzun illər mətbuat orqanlarında çalışan yubilyarın keçdiyi yolu xatırladıb, onun əmək fəaliyyətinin ayrı-ayrı vaxtlarda “Ağdam” rayon qəzeti, “Qarabağ”, “Ədalət” və “Respublika” qəzetləri ilə bağlı olduğunu bildirib. Təcrübəli jurnalistin peşəkarlıq keyfiyyətlərinin gənc qələm sahibləri üçün örnək olduğu vurğulanıb.

Diqqətə çatdırılıb ki, Salman Alıoğlu bu il milli mətbuatın 150 illiyi münasibətilə “Azərbaycan Respublikası Prezidentinin fəxri diplomu” ilə təltif edilib.

Əməkdar jurnalistlər Elşən Əliyev, Rəşid Faxralı, Əməkdar mədəniyyət işçisi Xanlar Məmmədov, araşdırmaçı-jurnalist Elxan Salahov və başqa çıxış edənlər tanınmış jurnalistin kitablarından, qələmə aldığı bədii nümunələrin xüsusiyyətlərindən danışıblar.

Qeyd edilib ki, onun publisistik məqalələrində və hekayələrində Qarabağın işğalı, qədim yurd yerlərindən didərgin düşən köçkünlərin taleyi, erməni faşizminin qəddarlığı, qarabağlıların üzləşdiyi haqsızlıq və 30 ilə yaxın Ermənistanın işğalı altında inildəyən torpaqların harayı və nəhayət, Vətən müharibəsində qazanılan möhtəşəm Zəfər geniş əks olunub. Onun yaradıcılıq nümunələrində kənd həyatı özünəməxsus bir koloritlə təsvir edilir.

İstefada olan polis polkovniki Sadir Məmmədov, “Olimpiya dünyası” qəzetinin redaktor müavini Aslan Şahverdiyev yubilyarla bağlı ürək sözlərini söyləyiblər.

Tədbirin yekununda Salan Alıoğluna Mətbuat Şurasının diplomu təqdim olunub.