Birinci Qarabağ müharibəsinin daha üç şəhidi illər sonra doğma yurdlarında torpağa qovuşub. Onlar 1993-cü ildə Füzuli rayonunun Qacar kəndi ərazisində gedən döyüşlər zamanı itkin düşmüşdülər. Qəhrəman döyüşçülərin nəşinin qalıqları İkinci Qarabağ müharibəsində (2020) torpaqlarımız işğaldan azad olunduqdan sonra aşkar edilib.

***

Avqustun 29-da Birinci Qarabağ müharibəsinin itkin şəhidi Sumbat Nüdrət oğlu Əliyev Füzuli rayonunda dəfn olunub.

Rayonun Aşağı Kürdmahmudlu kəndində vida mərasimi keçirilib. Mərasimdə şəhidin ailə üzvləri, icra hakimiyyətinin və hüquq-mühafizə orqanlarının əməkdaşları, hərbçilər, müharibə iştirakçıları və ictimaiyyət nümayəndələri iştirak ediblər.

Cənazə namazı qılınıb, şəhidlərin ruhuna dualar oxunub.

Vida mərasimindən sonra itkin şəhid hərbi orkestrin müşayiətilə kənd qəbiristanlığında torpağa tapşırılıb, dualar oxunub.

S.Əliyev 1966-cu ildə Füzuli rayonunun Aşağı Kürdmahmudlu kəndində anadan olub. Birinci Qarabağ müharibəsi zamanı könüllü olaraq döyüşlərə qoşulub. 1993-cü ilin aprel ayında Füzulinin Qacar kəndi ərazisində gedən döyüşlər zamanı itkin düşüb. Torpaqlarımız işğaldan azad edildikdən sonra S.Əliyevin qalıqları Xocavənd rayonunun Zoğalbulaq kəndində aşkarlanıb.

***

Avqustun 29-da Birinci Qarabağ müharibəsinin daha bir itkin şəhidi Rizvan Qara oğlu Hacıyev Kürdəmir rayonunda dəfn olunub.

Qocalı kəndində sakinlər, şəhidin ailə üzvləri, qazilər, eləcə də icra hakimiyyətinin, hüquq-mühafizə orqanlarının əməkdaşları, ictimaiyyət nümayəndələri iştirakı ilə vida mərasimi keçirilib.

Mərasimdə kənd sakinləri, şəhidin ailə üzvləri, qazilər, eləcə də rayon icra hakimiyyətinin, hüquq-mühafizə orqanlarının əməkdaşları, ictimaiyyət nümayəndələri iştirak ediblər. Cənazə namazı qılındıqdan sonra itkin şəhid kənd qəbiristanlığında torpağa tapşırılıb, dualar oxunub.

Dəfn zamanı hərbi orkestrin ifasında Dövlət himnini səslənib, yaylım atəşi açılıb.

Qeyd edək ki, R.Hacıyev 1993-cü ildə Füzuli rayonu istiqamətində gedən döyüşlər zamanı itkin düşüb. Onun qalıqları Füzulinin Qacar kəndi yaxınlığında aşkarlanıb.

***

Birinci Qarabağ müharibəsində itkin düşmüş hesab olunan Natiq Zeynal oğlu Kərimovun nəşinin qalıqları avqustun 29-da Qax rayonunda torpağa tapşırılıb.

Şəhidin doğulduğu Oncallı kəndində vida mərasimi keçirilib. Cənazə namazı qılınaraq şəhidlərimizin ruhuna dualar oxunub.

Kənd qəbiristanlığında keçirilən dəfn mərasimində şəhidin ailə üzvləri, yaxınları, rayon rəsmiləri, qazilər, şəhid ailələri, şəhidin döyüş yoldaşları, ictimaiyyət nümayəndələri iştirak ediblər.

Şəhidin nəşi yaylım atəşi altında torpağa tapşırılıb. Tabuta bükülmüş Azərbaycanın üçrəngli bayrağı şəhidin qardaşına verilib.

Natiq Kərimov 1971-ci il avqustun 3-də Qax rayonunun Oncallı kəndində anadan olub. 1993-cü il aprelin 2-də Füzuli rayonunun Qacar kəndi istiqamətində gedən döyüşlərdə itkin düşmüş sayılırdı.