Şirvan-Salyan Regional Mədəniyyət İdarəsi (RMİ) Biləsuvar rayon Mərkəzi Kitabxanasında görkəmli yazıçı Əlibala Hacızadənin (1935–2009) anadan olmasının 90 illiyi münasibətilə tədbir keçirilib.

Tədbir Biləsuvar Rayon İcra Hakimiyyəti, Şirvan-Salyan RMİ və Azərbaycan Yazıçılar Birliyi Muğan Regional bölməsinin birgə təşkilatçılığı ilə gerçəkləşib.

Tədbirdə Biləsuvar Rayon İcra Hakimiyyəti başçısının müavini, ictimai-siyasi və humanitar məsələlər şöbəsinin müdiri Ləman Yüzbaşova, Şirvan-Salyan RMİ-nin rəis vəzifəsini müvəqqəti icra edən rəis müavini Emin Mustafayev, Azərbaycan Yazıçılar Birliyi Muğan Regional bölməsinin sədri Nəbi İbrahimli, AMEA Ədəbiyyat İnstitutunun şöbə müdiri professor Vaqif Yusifli, mədəniyyət işçiləri, yazarlar, ədibin ailə üzvləri iştirak ediblər.

Çıxışlarda qeyd edilib ki, Əlibala Hacızadə Azərbaycan ədəbiyyatında özünəməxsus yeri olan yazıçılardan olub. Onun yaradıcılığı oxucuların mənəvi dünyasının zənginləşməsinə böyük töhfə verib. Yazıçının əsərlərində insan taleləri, mənəvi dəyərlər və ictimai problemlər yüksək bədii səviyyədə əksini tapıb. Bildirilib ki, yazıçının roman və povestləri təkcə mövzu baxımından deyil, həm də sənətkarlıq baxımından ədəbiyyatımızda dəyərli nümunələrdir.

Tədbirdə yazıçının əsərlərindən parçalar qiraət edilib, həyat və yaradıcılığını əks etdirən maraqlı faktlar təqdim olunub.

Yerli şairlər Biləsuvar rayonunda doğulub boya-başa çatmış yazıçıya həsr olunan şeirlərini söyləyiblər.

Nurəddin