Türkmənistan Elmlər Akademiyası tərəfindən Aşqabad şəhərində keçirilən “Sülhün və davamlı inkişafın gücləndirilməsində elmin rolu” mövzusunda beynəlxalq vebinarda ölkəmiz də təmsil olunub.

Çin, ABŞ, Böyük Britaniya, Yaponiya, Rumıniya, Özbəkistan, Qazaxıstan, Belarus və Tacikistandan alimlərin onlayn formatda qatıldığı vebinarda AMEA Nizami Gəncəvi adına Ədəbiyyat İnstitutunun direktor müavini filologiya üzrə fəlsəfə doktoru, dosent Mehman Həsənli “Dostluq və etimad: Azərbaycan-türkmən ədəbi əlaqələri timsalında” adlı məruzəsini təqdim edib.

Ədəbiyyat İnstitutundan bildirilib ki, məruzədə ötən əsrin əvvəllərindən formalaşan və bir əsrdən çox müddətdə zəngin inkişaf yolu keçən Azərbaycan-Türkmənistan ədəbi əlaqələrindən danışılıb.

Mehman Həsənli müstəqillik illərində qarşılıqlı ədəbi əlaqələrin daha geniş vüsət aldığını diqqətə çatdırıb. Xüsusilə AMEA Nizami Gəncəvi adına Ədəbiyyat İnstitutunda Məhtimqulu Fəraqinin adını daşıyan Türkmənistan Ədəbiyyat Mərkəzinin fəaliyyət göstərdiyini, AMEA-nın prezidenti akademik İsa Həbibbəylinin rəhbərliyi ilə institutda türkmən ədəbiyyatının və onun görkəmli klassiki Məhtimqulu Fəraqi irsinin öyrənilməsi istiqamətində bir sıra beynəlxalq elmi konfrans və sessiyaların keçirildiyini, monoqrafiya və kitabların nəşr edildiyini bildirib.