Azərbaycan Kinematoqrafçılar İttifaqının (AKİ) katibi, rejissor, prodüser Türkan Hüseynin “Kapitan və Xəzər dənizi” sənədli filmi Sarayevo Film Festivalının müsabiqə proqramına seçilib.

Bu barədə AKİ-dən məlumat verilib.

Mədəniyyət Nazirliyi tabeliyində Kino Agentliyinin dəstəyi ilə ərsəyə gələn “Kapitan və Xəzər dənizi” qısametrajlı sənədli filmi Avropanın nüfuzlu kino müsabiqələrindən olan Sarayevo Film Festivalının mükafatı uğrunda mübarizə aparacaq.

Sarayevo Film Festivalının (SFF) sənədli filmlər bölməsi Amerika Kino Akademiyasının mükafatlarına ("Oskar") birbaşa kvalifikasiya hüququ verir. Bu bölmədə qalib gələn tammetrajlı sənədli film növbəti mərhələdə “Oskar” mükafatının müvafiq kateqoriyası üzrə iddialılar siyahısına daxil olmaq imkanı əldə edir.

“Rental Azərbaycan” MMC tərəfindən istehsal olunan filmin ssenari müəllifi və rejissoru Türkan Hüseyn, prodüseri Emil Nəcəfovdur. 2023-cü ildə Kino Agentliyi tərəfindən keçirilmiş “Dövlət sifarişi və dəstəyi ilə istehsal olunan film layihələrinə dəstək müsabiqəsi”nin qaliblərindən olan layihə animasiya və arxiv materiallarının hibrid formasında işlənməsi ilə fərqlənir. Filmin animasiya hissəsi “Harmony of Chaos” studiyasında istehsal olunub.

Ekran əsəri 1990-cı ilin 20 Yanvar faciəsindən, həmin dövrdə Xəzər Dəniz Neft Donanmasının kapitanlarının, eləcə də tarixi hadisələri lentə alan jurnalist və operatorların fədakarlığından bəhs edir.

Qeyd edək ki, “Kapitan və Xəzər dənizi” layihəsi istehsal dövründə Krakov Film Festivalının market proqramında, həmçinin “Beldocs Pitching Forum” və “Balkan Watchers” platformalarında iştirak edib. Filmin ərsəyə gəlməsinə Azərbaycan Kinematoqrafçılar İttifaqı və İctimai Televiziya tərəfindən dəstək göstərilib.