Moldova paytaxtındakı Mariya Bieşu adına Milli Opera və Balet Teatrında Azərbaycanın dünyaca məşhur müğənni və bəstəkarı Müslüm Maqomayevin xatirəsinə həsr olunmuş “Sevgi və dəniz” adlı musiqi axşamı keçirilib.

Moldova Azərbaycanlıları Konqresinin himayəsi altında keçirilən tədbirə dövlət qurumlarının, diplomatik korpusun, mədəni ictimaiyyətin və diasporun nümayəndələri qatılıblar.

Konsertdən öncə Moldova Azərbaycanlıları Konqresinin sədri Elçin Bayramov və Azərbaycan mədəniyyət nazirinin müşaviri Cahangir Səlimxanov çıxış edərək dahi sənətkarın musiqi irsindən söz açıblar. Qeyd olunub ki, Müslüm Maqomayevin yüksək mədəniyyətin, qüsursuz bədii zövqün və sənətə həqiqi sədaqətin rəmzi olub. Onun özünəməxsus səsi, səhnədəki varlığı və müxtəlif nəsillərin nümayəndələrinin qəlbinə eyni dərəcədə dərindən nüfuz etmək bacarığı onu təkcə Azərbaycan deyil, həm də dünya musiqi mədəniyyəti üçün xəzinəyə çevirib. Onilliklər keçsə də, onun əsərləri insanları birləşdirməyə davam edir, dövrlər, ölkələr və mədəniyyətlər arasında canlı körpü olaraq qalır. .

Musiqi axşamında Moldova opera məktəbinin nümayəndələri Aleksey Botnarçuk (bas) və Gülnarə Raylyanu (soprano) Maqomayevin repertuarından əsərlər ifa ediblər.

“Sevgi və dəniz” musiqi axşamı böyük sənətkara ehtiram əlaməti olaraq Azərbaycanla Moldova arasında qarşılıqlı hörmət, dostluq və milli mədəniyyətin ən yaxşı nümunələrini qorumaq və təbliğ etmək üçün ortaq istək üzərində qurulmuş güclü mədəni əlaqələrin daha bir təzahürü olub.