Sumqayıt Dövlət Dram Teatrı 10 mart – Milli Teatr Gününü premyera ilə qeyd edəcək. Həmin gün tanınmış tatar dramaturqu Taufiq Minullinin “Ərmağanlı Əlməndər” əsəri əsasında hazırlanan “Sonuncu qonaq” tamaşasının premyerası olacaq.

Bu barədə teatrdan məlumat verilib.

Yeni səhnə əsərinə Xalq artisti Valeh Kərimov quruluş verib.

Bu tamaşa eyni zamanda uzun illərdən sonra görkəmli aktyorun Sumqayıt teatrında səhnəyə qayıdışı ilə əlamətdardır. Valeh Kərimov səhnə əsərində baş qəhrəmanı – Əlməndəri obrazını canlandıracaq.

Tamaşanın quruluşçu rəssamı Nizami Dadaşev, musiqi tərtibatçısı Gülcahan Yusifova, rejissor köməkçisi Ləman Məmmədli, rəqslərin quruluşçusu Kamil Ağazadədir.

Əməkdar artistlər Fəranə Musayeva, İlahə Səfərova, aktyorlar Oktay Mehdiyev, Akif Mirzəyev, Şəms Abdullayeva, Füzuli Qərənizadə, Elay Xasiyev və Aynur Hümmətova tamaşada rol alıblar.

“Sonuncu qonaq” fəlsəfi çalarları, incə yumoru və dramatik qarşıdurmaları ilə seçilən səhnə əsəridir. Əsərin mərkəzində Əzrail tərəfindən unudulub Yer üzündə qalan 91 yaşlı, həyata möhkəm bağlanan qoca Əlməndər dayanır. Həyat eşqi sönməyən, yenidən sevgi və macəra axtarışında olan Əlməndər gözlənilməz qonaq – Əzraillə üz-üzə qalır...

Tamaşa boyunca həyat və ölüm, insanın iradəsi, sevgi, zaman və taleyin qaçılmazlığı dərin fəlsəfi prizmadan təqdim olunur. Sonda isə Əlməndər taleyi ilə barışaraq axır qərarını verir...