Azərbaycan Milli İncəsənət Muzeyində Azərbaycan Rəssamlıq Akademiyasının 25 illik yubileyinə həsr olunmuş sərgi açılıb.

Bu barədə Milli İncəsənət Muzeyindən məlumat verilib.

“25 il sənət yolu” adlı sərginin açılışında Azərbaycan Rəssamlıq Akademiyasının rektoru Xalq rəssamı Natiq Əliyev, Rəssamlar İttifaqının sədri Xalq rəssamı Fərhad Xəlilov, elm və təhsil nazirinin müavini İdris İsayev, Xalq rəssamı Ömər Eldarov, Mədəniyyət və İncəsənət Universitetinin rektoru Ceyran Mahmudova, Milli Konservatoriyanın rektoru Kamilə Dadaş-zadə, ictimai xadim Həsən Həsənov, Milli İncəsənət Muzeyinin direktoru Şirin Məlikova çıxış edərək akademiyanın fəaliyyətinə nəzər salıblar.

Qeyd olunub ki, 2000-ci ildə Ulu Öndər Heydər Əliyevin təşəbbüsü və imzaladığı Sərəncamla yaradılan Azərbaycan Rəssamlıq Akademiyası ölkədə təsviri sənət sahəsində ali təhsilin inkişafında yeni mərhələnin əsasını qoyub. Akademiya milli incəsənət ənənələrini yaşadan, təsviri və dekorativ sənətin bütün istiqamətləri üzrə peşəkar kadrlar hazırlayan aparıcı ali təhsil müəssisəsi kimi mühüm rola malikdir.

Sonra tədbir iştirakçıları sərgi ilə tanış olublar.

Akademiyanın professor-müəllim heyətinin yaradıcılığını əks etdirən ekspozisiya rəngkarlıq, heykəltaraşlıq, qrafika və dekorativ tətbiqi sənət nümunələrini əhatə edir. Burada Azərbaycan təsviri sənətinin tanınmış nümayəndələrinin və digər müəlliflərin əsərləri ilə yanaşı, akademiyanın yaradıcı mühitində formalaşan istedadlı gənc rəssamların bədii axtarışlarını əks etdirən işlər də nümayiş olunub.

Ekspozisiyada həmçinin 1920-ci ildə Bakıda Əzim Əzimzadənin təşəbbüsü ilə yaradılmış Rəssamlıq Məktəbinin B.Mirzəzadə, D.Kazımov, O.Sadıqzadə kimi görkəmli yetirmələrinin əsərləri yer alıb. Həmin məktəb sonrakı dövrlərdə Azərbaycan Rəssamlıq Akademiyasının formalaşması üçün yaradıcı və pedaqoji baza rolunu oynayıb.

Yanvarın 10-dək davam edəcək sərgi akademiyada formalaşmış yaradıcılıq mühitini, bədii ənənələrin nəsillərarası davamlılığını və Azərbaycan təsviri sənətinin inkişaf yolunu dolğun şəkildə təqdim edir.