Noyabrın 28-də Muzey Mərkəzində müxtəlif inkişaf məhdudiyyətli, o cümlədən Daun sindromlu uşaqların əl işlərindən ibarət “Sevgi palitrası” adlı sərgi açılıb.

Mədəniyyət Nazirliyi və “Qayğı – sağlam nəsil naminə” İctimai Birliyinin dəstəyi ilə 3 dekabr – Beynəlxalq Əlillər Günü ərəfəsində keçirilən tədbir həm bir sosial çağırış, həm də insani duyarlılığın ifadəsi olub.

Bu, sadəcə rəsm nümayişi deyil, hər bir uşağın öz daxili aləmini, hiss, xəyal və düşüncələrini rənglərlə ifadə etdiyi sərgidir.

“Sevgi palitrası” yaradıcılığın məhdudiyyət tanımadığını, əksinə, hər bir fərdin içindəki gözəlliyin doğru şəraitdə necə çiçəkləndiyini göstərir. Layihənin əsas məqsədi, məhdudiyyətli uşaqların cəmiyyətə daha fəal inteqrasiyasına dəstək vermək, onların yaradıcılıq qabiliyyətlərini geniş auditoriyaya tanıtmaq, uşaqların özünə inamını gücləndirmək və onların daxili potensialını ortaya çıxarmaq, ictimaiyyətin diqqətini həssas sosial mövzulara cəlb etmək, cəmiyyətdə inklüzivlik mədəniyyətini təşviq etməkdir.

​Ekspozisiyada 21 uşağın əl işləri yer alıb. Rəsmlər bəzən bir uşağın sükuta bürünmüş iç dünyasını, bəzən isə həyəcanını, sevincini, narahatlığını, arzularını və dünyaya özünəməxsus baxışını ifadə edir.

Layihənin ideya müəllifi və uşaqların müəllimi gənc rəssam Mahizər Sadıqlı, sərginin koordinatoru sənətşünas Ziyarət Cabarova Qəhrəmanovadır.

Açılış mərasimində “Qayğı – sağlam nəsil naminə” İctimai Birliyinin nümayəndələri, rəssamlar, ictimai xadimlər və sənətsevərlər iştirak ediblər.

İki gün davam edən sərgi ziyarətçilərə uşaqların xəyal dünyasına səyahət edərək, duyğularını rənglərlə necə dilə gətirdiklərini görmək və ən əsası, bu uşaqların cəmiyyətin dəyərli bir parçası olduğunu hiss etmək imkanı yaradıb.