Payız rənglərin dəyişdiyi, təbiətin səssizcə özünü yenilədiyi mövsümdür. Rəssamlar bu fəsli öz fırçaları ilə əks etdirir, xəzanın rənglərini üzərində canlandırır.

Azərbaycanı özünə doğma diyar bilən türkiyəli rəssam Zəkiyə İnan bu mövsümün sehrini öz füsunkar yaradıcılıq dili ilə “Bakı” Rəsm Qalereyasında tamaşaçılara təqdim edir.

Noyabrın 28-də açılışı keçirilən “Payız yarpaqları” adlı sərgidə müəllifin 80-ə yaxın yağlı boya, sulu boya və xəttatlıq nümunələri nümayiş etdirilir.

Sərgi “İçərişəhər” Dövlət Tarix-Memarlıq Qoruq İdarəsi və Azərbaycan Rəssamlar İttifaqının təşkilati dəstəyi ilə gerçəkləşib.

“Bakı” Rəsm Qalereyasının rəhbəri, tanınmış rəssam Eldəniz Babayev çıxış edərək Zəkiyə İnanın yaradıcılığının İçərişəhərin qədim ab-havası ilə vəhdət təşkil etdiyini vurğulayıb. Bildirib ki, belə sərgilər İçərişəhərin mədəni həyatına yeni nəfəs gətirir və sənətin üfüqlərini genişləndirir.

"İçərişəhər” Dövlət Tarix-Memarlıq Qoruğu İdarəsi İdarə heyətinin sədri Rüfət Mahmud sərginin tarixi məkanlarda müasir sənətin təbliği baxımından böyük əhəmiyyət daşıdığını qeyd edib. Vurğulayıb ki, bu kimi tədbirlər İçərişəhərin zəngin irsini müasir yaradıcılıqla birləşdirərək, məkanı canlı bir mədəni platformaya çevirir.

Bakı Şəhər Mədəniyyət Baş İdarəsinin rəisi İbrahim Əliyev çıxışında Azərbaycan-Türkiyə mədəni əlaqələrinin sənət vasitəsilə daha da möhkəmləndiyini vurğulayıb, belə sərgilərin yaradıcı insanların tanınmasına və ölkələrarası mədəni dialoqun genişlənməsinə xidmət etdiyini deyibb.

Rəssam Zəkiyə İnan bildirib ki, onun məqsədi sərgidə payızın gözəlliyini və duyğularını tamaşaçılara çatdırmaq, həmçinin Azərbaycan ilə Türkiyə arasında mədəni və sənət əlaqələrini gücləndirməkdir.

Digər çıxış edənlər də rəssamın əsərlərində payızın duyğulu qatlarını, təbiətə zərif yanaşmasını və iki ölkə arasında qurulan sənət körpüsünün əhəmiyyətini vurğulayıblar.

Sərgi dekabrın 1-dək davam edəcək.

Zəkiyə İnan 1962-ci ildə Türkiyənin İsparta şəhərində anadan olub. Antalya Akdeniz Universitetinin İnşaat mühəndisləri fakültəsini bitirib. Təsviri sənətə olan həvəsi sayəsində 1999-2004-cü illərdə İstanbulun “Ulduz” sarayında hüsnxət, “Taksim Pera” sənət məktəbində isə rəssamlıq sənətinin sirlərini öyrənib. 2000-ci ildə İstanbulda ilk sərgisi keçirilib.

2004-cü ildə Zəkiyə İnan Bakıya gələrək Xalq rəssamı professor Arif Əzizdən sənət dərsləri alıb. 2009-cu ildə onun “Bakı” Rəsm Qalereyasında ilk fərdi sərgisi təşkil edilib.