Cəfər Cabbarlı adına Azərbaycan Dövlət Teatr Muzeyinin və Azərbaycan Teatr Xadimləri İttifaqının birgə təşkilatçılığı ilə Xalq artisti, Dövlət mükafatı laureatı Amaliya Pənahovanın (1945–2018) 80 illik yubileyinə həsr olunmuş tədbir keçirilib.

Tədbiri muzeyin direktoru Əməkdar mədəniyyət işçisi Sevinc Mikayılova açaraq Amaliya Pənahovanın milli teatr və kino sənətimizə böyük töhfələr vermiş görkəmli sənətkar olduğunu vurğulayıb.

Azərbaycan Teatr Xadimləri İttifaqının sədri Xalq artisti Hacı İsmayılov, teatr və kino aktyoru, Xalq artisti Rafiq Əzimov, teatrşünas, professor Məryəm Əlizadə, Bakı Bələdiyyə Teatrının baş rejissoru Xalq artisti Mərahim Fərzəlibəyov, Xalq artisti Əli Nur və digər çıxış edənlər Amaliya Pənahova ilə bağlı öz xatirələrini bölüşüb, onun zəngin yaradıcılığından danışıblar.

Tədbir çərçivəsində sənətkarın həyat və yaradıcılığını əks etdirən fotoşəkillərdən ibarət videoçarx nümayiş olunub, aktrisanın rol aldığı tamaşalardan və filmlərdən fraqmentlər göstərilib.

Amaliya Pənahovanın vaxtilə “Unuda bilmirəm” (İ.Əfəndiyev) tamaşasında ifa etdiyi eyniadlı məşhur əsər səsləndirilib.

Sənətkarın övladı, Bakı Bələdiyyə Teatrının direktoru Aynur Muxtarova muzeyin rəhbərliyinə və kollektivinə tədbirin təşkilinə görə minnətdarlığını bildirib. 

Amaliya Pənahovanın səhnə fəaliyyətindən qalan ən dəyərli yadigarlardan biri – aktrisanın 1971-ci ildə Tofiq Kazımovun quruluşunda Bəxtiyar Vahabzadənin “Yağışdan sonra” əsəri əsasında hazırlanan tamaşada geyindiyi libas və həmin tamaşadan bir nadir fotoşəkli sənətkarın ailəsi adından Azərbaycan Dövlət Teatr Muzeyinin fonduna hədiyyə edilib.