XI Bakı Beynəlxalq Kitab Sərgisində Azərbaycan Mətbuat Şurası tərəfindən hazırlanmış “Əkinçidən 50 il sonra” kitabının təqdimatı olub.

Tanınmış jurnalist, Əməkdar mədəniyyət işçisi Müsəllim Həsənovun müəllifi olduğu kitab milli mətbuatın 150 illik yubileyinə həsr olunub.

Tədbirdə Mətbuat Şurasının sədri Rəşad Məcid, Azərbaycan Dövlət İnformasiya Agentliyinin (AZƏRTAC) idarə heyətinin sədri Vüqar Əliyev, kitabın redaktoru Elşən Əliyev, professor Qulu Məhərrəmli və başqaları iştirak ediblər.

Mətbuat Şurasının sədri Rəşad Məcid yeni nəşrin əhəmiyyətini qeyd edib. Diqqətə çatdırıb ki, bu kitabın nəşri barədə qərar Prezident İlham Əliyev tərəfindən milli mətbuatın 150 illik yubileyinin keçirilməsi haqqında sərəncam imzalandıqdan sonra verilib. “Bu kitab asanlıqla oxunur və onun məzmunu ilə tanış olan hər kəsdə həqiqi maraq doğurur”, - deyə o vurğulayıb. 

Müəllif Müsəllim Həsənov nəşrin ideyasının necə yarandığını açıqlayıb: “Bir qayda olaraq, kitabın yazılması aylar, bəzən isə hətta illər aparır. Lakin bu halda iş daha sürətlə irəliləyirdi. Arxivdə tamam başqa axtarışlarla məşğul idim və gözlənilmədən 1925-ci ilə aid “Birinci Türk qəzetinin 50 illiyi ilə bağlı yazışmalar” adlı sənədlər qovluğuna rast gəldim və bu, məndə böyük maraq doğurdu. Bu materiallar kitabın əsasını təşkil etdi. Bundan sonra mən mətbuat tarixinin tədqiqatçıları - Rəşad Məcid, Akif Aşırlı və professor Qulu Məhərrəmliyə müraciət etdim. Məhz onların dəstəyi və birgə səyləri sayəsində kitab nəşr olundu”, - deyə o vurğulayıb.

Kitabın redaktoru Elşən Əliyev də nəşrin üzərində işlə bağlı danışıb. Qeyd edib ki, Müsəllim Həsənovun əsərlərini redaktə etmək eyni zamanda həm asan, həm də çətindir. Onun mətnləri zəngin dil, obrazlılığı, asan başa düşülməsi ilə seçilsə də, eyni zamanda müəllifin yüksək peşəkarlığına görə diqqətlilik tələb edir: “Onun əsərlərini oxuyaraq jurnalistikada çox şey öyrənmək olar - onlar tərz və ifadə üslubunu təkmilləşdirməyə kömək edir. Əminəm ki, bu kitab mütləq oxunmalıdır”.