Mərakeş çətin dövrdə həmrəylik jesti olaraq Fələstin xalqına, xüsusilə də Qəzza zolağının mühasirədə olan əhalisinə 180 tona yaxın təcili humanitar və tibbi yardım göndərib.

Bu barədə Mərakeş Krallığının Azərbaycandakı Səfirliyindən bildiriblər.

Qeyd olunur ki, bu addım İslam Əməkdaşlıq Təşkilatının Qüds Komitəsinin sədri qismində çıxış edən Mərakeşin Kralı VI Məhəmmədin tapşırığı əsasında həyata keçirilib.

Yardımın tərkibinə əsas ərzaq məhsulları, uşaqlar üçün ləvazimatlar, dərman preparatları, cərrahi avadanlıqlar, yorğanlar, çadırlar və mülki əhalinin əzab-əziyyətini azaltmağa yönəlmiş digər həyati vacib vasitələr daxildir.

Mərakeş Xarici İşlər Nazirliyinin məlumatına görə, xüsusi təşkil olunmuş dəhliz yardımın fələstinli zərərçəkənlərə sürətli və birbaşa çatdırılmasına imkan verəcək.

Mərakeşin təşəbbüsünü fərqləndirən yalnız yardımın miqyası və zamanı deyil, həm də ölkənin unikal diplomatik mövqeyidir. Regionun həm İsraillə, həm də Fələstin Administrasiyası ilə rəsmi münasibətləri saxlayan azsaylı dövlətlərindən biri kimi Mərakeş, bir çox müşahidəçilər tərəfindən də qeyd edildiyi kimi, tərəflərlə konstruktiv dialoqa girə bilən etibarlı vasitəçi kimi qəbul edilir.

Rabat bundan öncə də Qəzzanı dəstəkləmək üçün qətiyyətli addımlar atıb. 2024-cü ilin mart ayında Mərakeş Qəzzadakı fələstinlilərə quru yolla humanitar dəstək göstərmək üçün İsrail tərəfindən səlahiyyət verilmiş ilk ölkə oldu. Bu addım Krallığın diplomatik yolla məsələlərin həllinə qadir olduğunu, eyni zamanda Qəzza məsələsində qətiyyətli mövqeyini nümayiş etdirdi.

Hazırkı yardım kampaniyası Mərakeşin fələstinlilərin hüquqlarına davamlı dəstəyini, sülh, sabitlik və insan haqlarına sadiqliyini əks etdirir. Eyni zamanda, bu, dünyanın ən uzunmüddətli münaqişələrindən birində təcili humanitar ehtiyacların qarşılanmasında praqmatik diplomatiyanın əhəmiyyətini vurğulayır.

Bütün tərəflərlə əlaqələri qoruyub saxlamaqla yanaşı, fələstinlilərin hüquqlarını müdafiə edən Mərakeşin bu yanaşması həmrəyliklə strateji diplomatiyanı özündə birləşdirən və regionda az ölkənin bacardığı bir model təqdim edir.