Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı, Azərbaycan Dövlət Kukla Teatrının dəstəyi ilə “Nağılların audiovizual təqdimatı” layihəsi çərçivəsində “Qoğal” nağılı təqdim edilib.

MEMİM-dən verilən məlumata görə, layihənin məqsədi uşaq və yeniyetmələrin təfəkkür dairəsini genişləndirməklə onların dünya görüşünü, düşüncə tərzini, təxəyyülünü zənginləşdirmək, ədəbiyyata, teatra qarşı maraq yaratmaqdır. Layihə nağılların gələcək nəsillərə ötürülməsi, dilimizin inkişafı və qorunmasına xidmət edir.

İdeya, mövzu cəhətdən sadə sujet xətti üzərində qurulan nağılda müxtəlif xarakterlər obrazlı şəkildə çatdırılıb. Təqdimat Azərbaycan Dövlət Kukla Teatrında səhnələşdirilən “Qoğal” tamaşası əsasında hazırlanıb.

“Nağılların audiovizual təqdimatı” layihəsi çərçivəsində bir çox qədim və müasir nağılların təqdimatı nəzərdə tutulub.

Xatırladaq ki, layihənin ilk nümunəsi Xanımana Əlibəylinin “Dovşanın ad günü” nağıl-poeması, ikincisi isə Azərbaycan xalq nağılı “Məlikməmməd” olub.