M.Maqomayev adına Azərbaycan Dövlət Akademik Filarmoniyasında “Bir millət, iki dövlət” adlı konsert proqramı təşkil olunub.

Azərbaycan-Türkiyə qardaşlığına və mədəni birliyinə həsr olunan konsertdə əvvəlcə şəhidlərin əziz xatirəsi bir dəqiqəlik sükutla yad edilib, Azərbaycanın və Türkiyənin Dövlət himnləri səsləndirilib.

Türkiyənin Azərbaycandakı səfiri Birol Akgün, Xaricdə Yaşayan Türklər və Qohum Topluluqları İdarəsinin (Yurtdışı Türkler ve Akraba Topluluklar Başkanlığı – YTB) sədri Abdulhadi Turus, Elazığ Mədəniyyət və Tanıtma Fondunun başqanı Kadirhan Süngüroğlu çıxış edərək iki ölkə arasındakı mədəni əməkdaşlığın önəmini vurğulayıblar.

Konsertdə Ü.Hacıbəyli adına Azərbaycan Dövlət Simfonik Orkestrini məşhur dirijor, bəstəkar Bujor Hoinic (Türkiyə) və beynəlxalq müsabiqələr laureatı Mustafa Mehmandarov (Azərbaycan) idarə ediblər.

Solistlər Zeynep Halvaşi (metso-soprano), Feryal Türkoğlu (soprano), Aydın Uştuk (tenor), Mehmet Yılmaz (bas-bariton) və Turqay Coşkun (qanun) ifaları ilə könülləri oxşayıblar.

Proqramda Bujor Hoinicin “Harput” simfonik poeması (10 hissədə), Niyazinin “Türk marşı”, “Qaytağı”, Ü.Hacıbəylinin “Çırpınırdı Qara dəniz” əsərləri və “Sarı gəlin” Azərbaycan xalq mahnısı səslənib.

Sonda Elazığ Mədəniyyət və Tanıtma Fondu tərəfindən hər iki dirijora xatirə hədiyyələri təqdim edilib.

Konsert proqramı tamaşaçılar tərəfindən alqışlarla qarşılanıb.