Mədəniyyət Nazirliyinin təşkilatçılığı ilə dahi bəstəkar Üzeyir Hacıbəylinin 140 illiyi çərçivəsində paytaxtdakı aparıcı musiqi kollektivlərin ölkənin şəhər və payonlarna genişmiqyaslı qastrol səfərləri başlanır.

Layihənin əsas məqsədi regionlarda mədəni həyatın fəallaşdırılması, əhalinin, xüsusilə gənclərin asudə vaxtının səmərəli təşkili, həmçinin yerli yaradıcı kollektivlərlə qarşılıqlı ünsiyyət və təcrübə mübadiləsinin gücləndirilməsidir.

Qastrol proqramı çərçivəsində R.Behbudov adına Azərbaycan Dövlət Mahnı Teatrının estrada-simfonik orkestri dekabrın 1-də Sumqayıt şəhərində “Kimyaçı” Mədəniyyət Sarayında, dekabrın 27-də isə Şamaxı Rayon Mədəniyyət Mərkəzində çıxış edəcək.

Beynəlxalq Muğam Mərkəzindən solistlərin – xanəndə və instrumental ifaçıların dekabrın 3-də Bərdə Rayon Mədəniyyət Mərkəzində, Əməkdar kollektiv Səid Rüstəmov adına Xalq çalğı alətləri orkestrinin dekabrın 6-da Heydər Əliyev adına Xaçmaz Rayon Mədəniyyət Mərkəzində, Cahangir Cahangirov adına Xorun isə dekabrın 26-da Quba Rayon Mədəniyyət Mərkəzində konsertləri planlaşdırılır.

2026-cı il yanvarın 23-də M.Maqomayev adına Azərbaycan Dövlət Akademik Filarmoniyasının Q.Qarayev adına Azərbaycan Dövlət Kamera Orkestrinin Fikrət Əmirov adına Gəncə Dövlət Filarmoniyasında konsert proqramı nəzərdə tutulur.