Bu il Azərbaycanın görkəmli qəzəlxan şairi Əliağa Vahidin (1895–1965) anadan olmasının 130, vəfatının 60 illiyidir.

Avqustun 29-da “İçərişəhər” Dövlət Tarix-Memarlıq Qoruğu İdarəsinin təşkilatçılığı ilə şairin xatirəsinə həsr olunmuş yaradıcılıq gecəsi keçirilib.

Proqram İçərişəhərdə, Vahidin abidəsi önündə təqdim olunub.

Əməkdar artist, rejissor, aktyor, Əliağa Vahid haqqında filmdə (1991) baş rolu oynamış Loğman Kərimov şairin yaradıcılığının milli poeziyamız üçün əhəmiyyətindən danışıb, onun əsərlərinin bu gün də aktual olduğunu vurğulayıb.

Aktyor, teleaparıcı Kamran Ağabalayev və aktyor Sənan Əlləz şairin qəzəllərini qiraət ediblər.

Əməkdar incəsənət xadimi, ustad xanəndə Aqil Məlikov unudulmaz şairin Azərbaycan ədəbiyyatında xidmətlərindən söz açıb, onun qəzəlləri üstündə muğam parçaları ifa edib.

Xanəndə Nisbət Sədrayevanın ifası da Vahid poeziyasından ilhamlanıb.

İfaçıları tarda Səxavət Məmmədov, kamançada Toğrul Əsədullayev müşayiət ediblər.

Gecəyə xüsusi məna qatan məqamlardan biri isə rejissor Şahmar Ələkbərovun çəkdiyi “Qəzəlxan” filmindən epizodların nümayişi olub.