Azərbaycan Dillər Universitetinin (ADU) beynəlxalq əlaqələr üzrə prorektoru dosent Jalə Qəribovanın müəllifi olduğu “Sosiolinqvistika” dərsliyi çapdan çıxıb.

Universitetdən bildirilib ki, nəşrin elmi redaktoru ADU-nun rektoru akademik Kamal Abdulla, rəyçiləri akademik Nizami Cəfərov, professor Fikrət Cahangirov və dosent Əsgər Quliyevdir.

ADU Elmi şurasının qərarı ilə işıq üzü görmüş dərslik ali təhsil müəssisələrində bakalavriat səviyyəsində təhsil alan tələbələr üçün nəzərdə tutulub.

Yeni nəşrdə sosiolinqvistika elminin əsas istiqamətləri, dilin sosial mühitlə qarşılıqlı əlaqələri, dil və kimlik, çoxdillilik, regional və sosial dialektlər, kod keçidi, süni dillər, dil siyasəti və dil ekolojisi kimi aktual mövzular geniş şəkildə təhlil olunub. Müəllif mövzulara müasir elmi yanaşmalar əsasında baxıb və sosiolinqvistikanın interdisiplinar əlaqələri nəzərə alınıb.

Dərslik Azərbaycan dilçiliyində sosiolinqvistika fənninin elmi-metodik bazasının zənginləşdirilməsinə, tələbələrin nəzəri biliklərinin dərinləşdirilməsinə və mövzunun qlobal elmi kontekstdə araşdırılmasına mühüm töhfədir.

Jalə Qəribova ön sözdə qeyd edib ki, dərsliyin yazılmasının əsas məqsədi Azərbaycanda sosiolinqvistika sahəsində araşdırmalara az da olsa töhfə vermək, universitetlərin proqramlarında yer alan bu fənnin tədrisi üçün ana dilində müasir tələblərə cavab verməyə cəhd edən bir dərslik ərsəyə gətirməkdir: “Bu dərslikdən əvvəl Azərbaycan dilində Əbülfəz Rəcəblinin “Sosiolinqvistika” (2004) və Fəxrəddin Veysəllinin “Sosiodilçilik” (2022) əsərləri nəşr olunub. Hər iki müəllifdən faydalanmaqla yanaşı, bu dərslikdə əvvəlki mənbələrdə yer verilməyən bir çox yeni mövzulara işıq salmağa, problemlərə yeni bucaqlardan baxmağa, araşdırılan məsələlərə yeni metodoloji yanaşma tətbiq etməyə çalışmışıq. Onu da qeyd etmək istərdim ki, sosiolinqvistik araşdırmalarda ilk addımları “Azerbaijan International” jurnalının redaktoru Betti Bleyer ilə birlikdə həmin jurnalda “Sosiolinguistically Speaking” (“Sosiolinqvistik etiketlər”) rubrikası çərçivəsində yazdığımız yazılarla atmağa başlamışdıq”.

Kitabdan sosiolinqvistikanın əsas anlayışlarını, nəzəri müddəalarını və metodlarını öyrənən və araşdıran tədqiqatçılar, həmçinin dil-cəmiyyət əlaqələri ilə maraqlanan oxucular da faydalana bilərlər.