Mədəniyyət Nazirliyi və Laçın rayonunda Azərbaycan Respublikası Prezidentinin Xüsusi nümayəndəliyinin təşkilatçılığı ilə 29-30 noyabr tarixlərində Laçın şəhərində “MDB-nin Mədəniyyət Paytaxtı – 2025” ilinin rəsmi bağlanış mərasimi keçirilir.

Bağlanış tədbirlərində ölkəmizdən, Belarus, Qazaxıstan, Qırğızıstan, Özbəkistan, Rusiya və Tacikistandan nümayəndələr iştirak edirlər.

Xatırladaq ki, MDB Humanitar Əməkdaşlıq Şurasının 2024-cü ilin 8 oktyabr tarixli qərarına əsasən, Azərbaycanın Şərqi Zəngəzur bölgəsinin Laçın şəhəri 2025-ci ildə “MDB-nin Mədəniyyət Paytaxtı” elan olunub.

***

Bağlanış tədbirləri proqramı çərçivəsində noyabrın 29-da qonaqların Laçın şəhəri ilə tanışlığı olub. Ekskursiya şəhərdəki "Hoçazfilm" studiyası, "Gilabi" yaradıcılıq mərkəzi, "Yurd" qalereyası kimi məkanları əhatə edib.

Laçın şəhərinin tarixi-mədəni və təbii zənginlikləri, Ermənistan tərəfindən işğalı və 44 günlük Vətən müharibəsində Qələbəmizin nəticəsində azad olunması, qısa müddətdə yenidən qurulması və keçmiş məcburi köçkünlərin mərhələli şəkildə doğma yurda qayıdışı haqqında ətraflı məlumat verilib.

***

Özbəkistanın Azərbaycanda Mədəniyyət Günlərinin keçirildiyi 70-ci illərdə bu yerlərə gəlmişdim. Hesab edirəm ki, mən xoşbəxt insanam, çünki burada Heydər Əliyev, Tofiq Quliyev, Rəşid Behbudov, Müslüm Maqomayev, Zeynəb Xanlarova kimi görkəmli insanlarla görüşmüşəm.

Bunu Özbəkistanın Xalq artisti, müğənni Mansur Taşmatov deyib.

Laçının heyrətamiz gözəlliyi olan bir məkan olduğunu bildirən qonaq bura ilk dəfə gəldiyini, amma illlər öncə konsertlər verdikləri Şuşanı və Ağdamı yaxşı xatırladığını söyləyib. O, Molla Pənah Vaqifin şeirinə mahnı yazdığını da diqqətə çatdırıb: “Xüsusilə “Xumar-xumar” misralarının yer aldığı şeiri məni dərindən təsirləndirdi. Onu oxudum və dərhal bir mahnı yarandı. Bu mahnını Özbəkistanda sevgi ilə ifa edirəm. O, özbək dilinə tərcümə olunub. Çox ümid edirəm ki, burada da səslənəcək”.